2013年7月3日 星期三

東京鐵路介紹 (JR, Metro)

日本既鐵路網非常覆雜, 但係覆雜既優點係總有一個地鐵站喺附近. 亦都因為日本既鐵路路線, 就算同一條線都會有好多唔同既終點站, 就好似香港東鐵綫咁有分羅湖車同落馬洲車一樣. 所以未去過日本, 又或者本身對日本鐵路唔熟既朋友, 記得睇左呢篇先喇.

日本既鐵路簡單可以分為 JR私鐵 兩種. JR是日本鐵路集團經營, 而私鐵其實是私有化鐵路既統稱, 單單東京圈內計, 已經有幾家私鐵公司, 包括: 都營, Metro, 小田急電鐵, 東急電鐵, 西武等等. 一般黎講, JR既線係可以互相免費轉乘的, 而私鐵線亦都可以各自互相轉乘. 但係由於各私鐵既停站位置有差異既關係, 部份車站係需要乘客先出閘, 然後步行至另一家私鐵車站大堂再入閘的, 就好似香港尖沙咀同尖東站既關係咁. 所以上文提到, 去得日本玩, 記得買定張SUICA(八達通). 咁樣轉車會方便好多.


另外, 日本既鐵路亦都類似台灣台鐵咁, 分左好多種唔同速度既車次, 包括有站站停既 "各停", 飛少少站既 "快速Rapid", 再飛多少少站既 "急行Express / 通勤特急", 同埋唔駛點停站既 "特急Limited Express". 要注意既係, JR同埋開往市郊既私鐵既特急班次多數都係採用 "對號座" 列車的, 咁用得對號座咁爽當然要比貴D錢, 一般會比普通車貴多一倍價錢. 而市區內行走, 採用普通地鐵列車行走既私鐵線特急車就無需加錢, 當普通車咁搭就得架喇. 所以起日本搭地鐵有時真係唔駛急, 搭下一班急行可能仲快過之前一班車去到目的地. 


上面個時間表係一個例子, 大部份既車站都會有明確既時間表列出黎比大家睇. 日本既鐵路係實時的, 幾點開就幾點開, 唔似香港地鐵咁預唔到時間. 而時間表唔同顏色既字代表唔同既班次.


另外, 喺大部份JR同私鐵既月台, 都會有該路線列車停站既列表, 你只需要留心睇每一個車站旁邊既 "點", 就可以知道邊種車次係會途經該車站. 以上面為例, 澀谷就四種車次都會停, 而代官山站就只有 "各停" 既班次會停站. 一般黎講, 急行車飛得既站都係D比較少人上落既車站, 所以應該對各位旅遊人士影響不大既. 

喺分開介紹JR同私鐵之前, 我想同大家講, JR會比私鐵貴少少. 但係由於JR轉車比較方便, 亦都係起地面/架空行走既關係, 筆者同各大旅遊書一樣, 比較推薦大家搭JR線遊日本. 


JR East (JR東日本)


各位可以經上面既連結下載JR東日本(即東京市), 最新既路線圖旁下身. 太花睇唔明既唔緊要, 睇下面呢幅.
初次去東京既朋友, 一般旅遊書都會介紹你搭JR山手線架喇 (如上圖). 原因係JR山手線係一條圓形既線, 佢有分順時針同逆時針兩種班次行走, 平時大家去日本既主要旅遊點佢都可以去到, 所以對初學者黎講絕對係一件美事. 最多你搭錯車既話, 浪費少少時間搭返轉頭又或者順住轉一圈, 點都會去到目的地. 而呢個圓形既中間有一條打橫既叫做中央線(想飛站既就搭中央線快速啦), 有左呢條中央線之後, 由左去右或者由右去左都會快一半時間以上. 日後既旅遊介紹會寫明你點搭車架喇. 我地又好簡單咁介紹東京市最常去既景點先. 我會以上面個圓形, 劃開四份黎講:

左上方:  池袋, 新宿
左下方:  原宿, 澀谷, 惠比寿, 目黑, 自由之丘
右下方:  新橋(去台場的), 築地(JR去唔到的!!), 東京, 東京迪士尼(東京站再轉車)
右上方:  秋葉原, 上野, 日暮里, 淺草(JR去唔到的!!)

咁樣劃分為四份黎記, 係記容易好多呢? 大家自己編行程時用以上四組地方黎編就唔會編到一日都行唔晒啦.


私鐵


以上係私鐵線既路線圖, 同樣地, 記得出發前PRINT出黎旁下身, 特別係私鐵線有太多站, 有時你想點轉車都去到. 另外, 由於要解釋私鐵線比較覆雜, 所以日後大家睇呢個BLOG既時候, 無得搭JR既地方我先會再教大家搭私鐵. 一般黎講, 淺草(即係雷門), SkyTree, 台場, 築地都係要搭私鐵先去到的.


直通運轉



介紹一樣比較覆雜既野, 睇得明就明, 唔明既無所謂當無聽過. 呢樣野就叫做 "直通運轉".  是咁的, 上面講到日本有好多私鐵公司既關係, 所以整左數十條路線出黎. 表面上就好方便, 但係如果我叫你搭幾個站就轉一次車既話你都咪話唔煩? 所以日本政府就用左 "直通運轉" 既方式黎穿連住各路線. 我以香港地鐵黎做例子, 拿, 原本東涌線既車去到東涌就係尾站, 但係依傢政府要直通運轉, 於是東涌線列車就會踩入機場快線既地盤再去機場同博覽館停站. 相對地, 機場快線既列車喺博覽館/機場出發後, 亦會踩入東涌線地盤停東涌站再出市區. 大家可以見到, 呢個好處係乘客唔需要轉車, 一程過就可以去到目的地. 至於啲錢點分就由兩間公司自己拆掂佢. 亦都因為咁, 大家喺日本搭私鐵時好多時都會見到同一條路線有幾間唔同公司既列車行走. 這是正常的事!! 上面張POSTER, 就介紹左今年四月開始, 有新既直通運轉路線, 乘客可以由新宿三丁目, 經澀谷, 直達橫濱! 以前要喺澀谷站落車出閘之後再轉車架!


SUICA

SUICA同香港既八達通調番轉. 八達通入閘時如果無錢佢就唔會比你入閘, 要你增值左先可以入閘的. 而日本既SUICA就方便好多, 閘會照比你入, 但係落車時唔夠錢就會唔比你出閘. 呢個時候唔駛擔心. 無論JR定私鐵, 每個車站既出閘口附近都會有個大告示牌寫住 "精算機" 的. 精算機其實就係增值機了, 你唔識日文唔重要, 你插張SUICA落去, 佢會寫住你仲有幾錢剩, 同埋呢一程車資係幾多. 你可以選擇淨係支付呢一程車資既尾數又得, 又或者可以以整數(即500,1000)咁去增值亦得. 呢部機有得找贖的, 放心.

最後提提各位, 當你離開日本既時候, 你係可以去返機場JR既客戶服務中心, 即係上集介紹過既Travel Service Centre嗰間鋪, 比番張SUICA佢退返按金的, 即是同香港退八達通情況一樣. 你就咁拎住張SUICA行埋去佢已經知你想退咭架喇. 不過有件事要先說明!! 如果你張咭入面仲有錢剩既話, 退咭時剩番既錢係退唔足比你的, 因為要扣手續費!! 所以最理想既做法係, 當你最後一日用SUICA既時候, 多D用黎買野飲, 買野食, 盡諒用盡張咭佢. 最後再用佢搭一程JR/私鐵, 於精算機增值時淨係比該程車既尾數. 就可以完全地用晒張咭既錢架喇.

(以上部份相片取自 "林氏璧和美狐團三狐的小天地", 路線圖轉載自JR東日本以及都營地下鐵官方網頁)

沒有留言:

張貼留言