輕井澤 (17年4月更新)

今日去遠少少，帶大家去近年好多香港人去既輕井澤。由東京搭新幹線過黎約一小時十分鐘車程。（搭得新幹線當然要買ＰＡＳＳ，否則單程車費已經要５３９０円）另外提提大家，輕井澤呢度係高原地區，亦係日本人既避暑山莊，所以就算東京幾熱都好，黎到呢度都總會覺得陣陣涼，記得帶定件風褸黎。

輕井澤有日本小瑞士之稱，呢度既賣點就係歐陸式既建築物、樹木同瀑布。搭左成個鐘頭新幹線，一落車，呢個站得兩個出口（南口同北口），南口基本上只係去OUTLET（王子購物廣場）；而北口就係去景點的，例如：舊輕井沢銀座通、聖保羅教堂、雲場池同白絲瀑布。依傢我地去南口行下OUTLET先。

王子購物廣場

呢度真係大到無人有，中間大大個草地係容許遊客上去踩下坐下的。不過由於當日超大雨，所以大家見唔到有人。一如日本既OUTLET MALL，呢度咩牌子都有，價錢都算平。好多人專登黎輕井澤行呢個OUTLET的。

舊輕井澤 

離開王子購物廣場之後，穿過火車站，去番北口方面。

一出火車站，只要沿住呢條輕井沢本通り就可以去到上面講過既景點，當然啦，行就比較遠，踩單車係最好的。不過下圖呢幾間都唔好幫襯, 因為我會介紹一間最平既比你, 留番最尾先講.

從上面地圖可以見到，只要沿住輕井澤站北口（即係上文介紹過既輕井沢本通り）一路行就可以去到聖保羅教堂（以及附近既銀座通），再北上最遠就可以去到白絲瀑布(去瀑布必須搭巴士前往, 從輕井澤站北口既巴士站搭巴士直達白絲瀑布，車費為710円，車程約２３分鐘, 另文有詳細介紹http://thatswhystravel.blogspot.hk/2017/04/blog-post.html）。踩單車既話慢慢邊踩邊睇，花半天時間岩岩好，留番半天行OUTLET，咁就可以一次過滿足晒兩個願望。

舊輕井沢銀座通

當你黎到呢座咁靚既電話亭既時候, 前路就係分叉路, 左手邊沿三笠通り可以去到舊三笠酒店, 而右手邊就係去銀座通行街既, 我地依傢去銀座通先.

閒日黎既話, 好多鋪都無開, 星期六日黎會熱鬧好多, 而除左行街之外, 中段仲有一個商場仔, 叫Church Street.

Church Street主要係西色食肆. 而穿過呢個商場既另一面就係聖保羅教堂.

影完教堂繼續行銀座通......

喺香港, 大家都聽過啲人去輕井沢結婚, 都知輕井沢好似沖繩咁, 鍾意整玻璃教堂. 而銀座通呢度正正有一間, 真係全玻璃的. 我唔詳細介紹喇, 繼續行......

點解我會影呢條橋呢? 呢條橋個名叫二手橋. 當地旅遊書話景點黎架喎. 有興趣既朋友自己黎研究下, 我走先.

提提大家: 星期六日銀座通可能會禁止單車進入的. 所以你就要先搵個地方泊好部單車先慢慢行入去. 上面地圖介紹左一個停車場既位置, 呢個停車場係泊車同單車都可以的, 見下圖.

泊私家車當然要比錢, 泊單車就免費既, 沿住行人路踩到尾, 就會見到上圖呢個泊單車場. 個個都泊呢度架喇, 唔好諗住推部單車入銀座通是但搵位泊, 日本人最憎違例泊車的. 

舊三笠酒店

呢段路叫落葉大道, 係要出馬路踩單車的.

沿住三笠通り, 一路去到落葉大道, 再踩到尾, 右手邊就會見到呢座舊三笠酒店, 依傢變左資料館, 入場要比錢的. 所以我都係影張相就算. 另外提提大家, 雖然落葉大道好靚, 兩邊都係樹, 喺中間踩單車穿過時真係好鬼High. 但係由於呢條係行車路既關係, 想停正喺路中間影相既朋友, 要快快手影完就好行埋一邊繼續踩, 仲要搵個朋友幫你睇車. (我得一個人所以影唔到喇)

雲場池

無論你係由銀座通過黎, 或者由JR輕井沢過黎都好, 當你見到呢個迴旋處既話, 即是你已經黎到雲場池既入口.

鍾意影相或者航拍既朋友, 一定要黎雲場池. 呢個湖又稱天鵝湖, 景色一流. 唔黎會後悔, 唔信既話睇下面既相......

交通指南

今集交通指南唔係教你搭車, 因為文章一開始已經講左, 反而係教大家租單車.

當你出左JR輕井沢站之後, 經北口個巴士站出, 就會見到上圖呢間寫住1日￥500既單車鋪. 大家睇過本文一開始既相就知租單車係要成千YEN一日的, 而呢間鋪只需￥500, 即係平一半!! 既然平一半就唔好糟質自己, 比貴少少, 用￥1000租部電動單車好過啦!

輕井沢話大唔大話細都唔細, 由JR輕井沢踩去銀座通都要10分鐘, 踩去舊三笠酒店既話仲要廿幾分鐘添. 即是你玩個來回再去埋雲場池最少都要兩個鐘. 所以租部電動單車可以慳力好多, 踩法同平時既單車係完全一樣, 亦都可以轉波, 只係當你一用力踩既時候, 佢就會觸發個摩打轉動, 所以你好細力踩部車都識自己去, 特別係上斜時更加明顯. 無介紹錯架!

除左以上幾個景點之外，喺輕井澤站既北口有個遊客服務中心，入面有好多小冊子介紹輕井澤的，仲有好多特別既景點位於中輕井澤站附近，例如セゾン現代美術館，如果大家有時間既話，可以搭一個站火車去中輕井澤站行下。


唔好以為咁就玩完喎, 火車站入面仲有好野。

信州有兩大特產，一樣係味噌，另一樣係峠の釜めし. 呢個釜飯唔講得笑, 咸既甜既料都有, 有冬菇, 瘦肉, 鵪鶉蛋等等. 再加埋鼓油撈飯, 好味到不得了. 呢個飯只需￥1000, 唔識日文唔緊要, 你講 "便當" 佢地就會明. 最神奇既係, 佢真係連埋個瓦煲送埋比你的. 你帶埋上新幹線又得. 否則即場食完可以還返比佢. 下次去輕井沢一定要試下喇!! 

最後比埋個新幹線時間表比大家，約一小時有一班車直達東京，行OUTLET之前，去JR客務中心劃定回程既位先就穩陣喇。

相關文章:
白糸の滝 (白絲瀑布)
草津溫泉


下一集，會帶大家去當時水災最嚴重既栃木縣行下鬼怒川、日光同埋宇都宮。

(本文地圖取材自谷歌地圖，水災相片轉載自日本電視新聞截圖)