墾丁係台灣既最南部。呢度無高樓，無繁華既街道，兼好鬼死遠（離高雄兩個半小時車程），仲有個未爆炸既核電廠添。不過，自從N年前既一套“海角七號＂同埋一年一度既墾丁春吶之後，墾丁就出名起黎。
香港人成日話“去墾丁”，其實筆者覺得係一個統稱。事實上淨係計墾丁呢個地方已經包含左好多景點，包括鵝鑾鼻，風吹砂等。再加埋周邊既小城，應該有荃灣到屯門咁大範圍.
我地睇下地圖先：
大家集中睇地圖紅色既字就可以了。
1） 四重溪 － 一個專門浸溫泉既地方，呢度除左有大大小小既溫泉酒店之外，仲有公共溫泉浴室，完全免費。可是一般來說，四重溪係台灣本地人去既比較多，香港人搭得兩個幾鐘車既話，都集中去晒墾丁玩了。(由四重溪搭的士去墾丁大街約半個多小時)
2） 車城 － 呢個地方仲少香港人去，呢度係一個古城，有間好出名而有好老既廟叫做福安宮。
3） 恒春 － 去得墾丁的話，都必定會到一到呢個地方，恒春係一個好細既城市（應該叫古城），有老街行，有野食有便利店，仲有警署。好安全的。再加上恒春有一個好出名而又好多年青人鍾意玩既野，就係玩火！恒春旁邊有個叫“出火”既地方，專門比你玩煙花的。仲有個全亞洲最大既海洋生物博物館同埋玩半浮潛艇既貓鼻頭。另外，海角七號就係喺呢度拍架喇，想搵景點既話就等睇往後恒春篇時再講。跟住沿住恒春一路往墾丁既馬路兩旁，有好多唔同既刺激玩意：賽車、草地滾球、大腳八四驅車飛沙漠等。所以去墾丁的必定會去埋恒春。
4） 墾丁 － 墾丁有無限既陽光與海灘，仲有過百間民宿同三間酒店（民宿我會另開一篇文章介紹）如果你放大上面張地圖黎睇既話，墾丁其實由一條 V字型既馬路而連成的。所以想一天遊也好，兩天遊都好，沿路玩到尾就可以。
墾丁包括左以下幾個較為出名既景點: 墾丁大街、墾丁公園、船帆石、鵝鑾鼻、台灣最南點、龍磐公園（幾年前HotCha個永城廣告呀！）、風吹砂，同埋港口吊橋。
前往墾丁方法：
一般黎講，我地會由高雄市（你間酒店或者機場）或左營高鐵站前往墾丁，另外屏東都有公車去恒春的（香港人應該唔會住屏東亦都唔熟屏東掛？）。而前往墾丁既方法得兩種，一係搭公車(約兩個半小時 )，一係搭的士(約一個小時45分鐘）以下有詳細既介紹。
1）墾丁快線
墾丁快線公車，由左營高鐵站門口來往墾丁，班次約15分鐘至半小時一班。車費為NT$383。車程約兩個半小時。營運時間係朝八晚七時，兩邊總站既營運時間都係差唔多一樣。如果以上時間以外既話，唔駛驚，有通宵公車的，我唔知幾錢，不過要站站停，車程約三小時！
2）共乘的士
說實話，我真係唔會介紹你搭公車去墾丁，一黎你唔熟路，唔知邊間民宿邊個站落。二黎車程太耐，人有生急咁點算？所以都係搭的士啦。一兩個人怕搭的士好貴? 唔怕！高雄有“共乘的士”（又稱併車）的，即係香港我地叫既泥鯭的士。車程約一個小時45分鐘。每人收費約為NT$350-450。視乎上落車既地點而定。唔知邊度有得搭既話，好簡單，又係去左營高鐵站門口，就有條長長既的士等緊你，你行埋去問係咪去墾丁就可以。而跑墾丁線既的士一般都係七人車，所以如果你一行四至七人，又驚同人SHARE一部的士既話，咁不如包車啦。包車價錢一般NT$2500。（記得要預行李位置，因為七人車坐盡既話就無位放行李架喇。如果你真係七個人去既話，就要租9人車，價錢約為NT$3500。不過當然，如果你唔放心同陌生人搭的士，又或者驚的士司機信唔過既話，你訂民宿既時候，佢可以安排車接你的，價錢同包車相近。咁我去墾丁又坐咩車？梗係坐朋友3A租車安排既共乘的士啦，所有我既朋友去墾丁都係搵佢，你只要話比佢知你邊日幾點由邊度出發，佢就會安排架喇。
墾丁市內交通
講起墾丁市內交通呢個話題就真係最麻煩，每位第一次去墾丁既朋友都好擔心呢個問題，而我既建議只有一個，就係租電單車。事關墾丁的確好大，例如由墾丁大街去恒春古城，約10公里路程（即是一條屯門公路咁長）。所以雖然有單車你租，但係好明顯係唔可行既事。不過咁，今日寫得呢篇文章就梗會比幾個方法你既，唔係嚇到無人敢去墾丁了.1） 墾丁街車
其實即係墾丁公車，同墾丁快線係同出一門的，不過就淨係穿梭墾丁、恒春、四重溪呢幾個地方。班次約30分鐘一班，車費係一日任搭NT$150。可以帶埋單車上公車，不另收費。不過，由於班次較疏，另外部份景點，你係需要喺恒春站轉車的，所以，呢個方法當我無講過吧.
2）包車一天遊 (8小時)
無論你租民宿也好，酒店也好，佢都會主動推介呢個服務比你。包車一天玩8個鐘，收費大約NT$3500。景點佢會安排好比你架喇。一般黎講我下幾篇文章將會介紹既景點都會帶你去到。唯一唔好處就係每個點你玩唔耐，例如你總唔可能叫司機等你一個鐘頭玩賽車吧，否則你就會少左一個鐘頭包車遊。不過呢個方法對第一次去墾丁的朋友非常好，你第一日去到可以當認識下當地既地方先，第二日再自己搭的士去你想去玩既景點。如果你搞唔掂，又或者唔想要民宿安排既包車遊既話，都可以找我朋友3A租車，筆者勝在朋友多。哈。（提提一句，有網友反映近年民宿安排既包車質素參差，最常見既係，部車唔係你“包”左的，司機會放低你在某個景點，然後走左去車第二團。就算你話唔想睇某個景點，又或者你想行一陣轉個頭就走都唔可以，因為部車走左了。所以唔好再貪平，找我朋友吧，有問題仲有我比你出氣。）3）租車 / 電單車 (筆者最愛)
最後，最自由，而筆者最愛既方法，就係租車了（筆者租電單車的）。上文講過，墾丁其實係由一條好長既 V 字型街道所連結成，所以真係唔駛怕迷路。這是不可能的事 =.=" 但係如果你無車牌或者國際車牌咁點算呢? 睇下面：
呢部就係我口中所講既“電”單車了。無錯，佢其實算係一部單車，不過係電動既單車而已。所以無車牌都可以騎。我每次去墾丁都係租呢種電單車載埋我老婆周圍去的。日租每天（6小時計）約為NT$700-800。你只要識踩單車就應該踩得掂佢架喇，部車有車頭燈、有響安、有指揮燈，開到盡大約30km/h，但係筆者落斜時開到60km/h都無問題。放心啦，白天既墾丁，路又闊，車又少，無事的。夜晚行墾丁大街就另計。另外提提大家一句，呢款車其實係要一人一車的，不過我就梗係乜都得啦，朋友多，呵呵。
3A租車facebook：https://www.facebook.com/www.3A.com.tw/?fref=ts
墾丁快線網頁：http://www.taiwantrip.com.tw/busline_post_s10.html
墾丁街車網頁：http://www.ptbus.com.tw/03/0302a.htm
(本文部份相片取材自墾丁街車及墾丁快線網頁)
相關文章
墾丁篇之 - 恒春鎮, 出火
墾丁篇之 - 後壁湖 (半浮潛船睇珊瑚, 墾丁核電廠)
墾丁篇之 - 墾丁大街
墾丁篇之 - 船帆石, 鵝鑾鼻, 風吹砂
沒有留言:
張貼留言