2018年5月22日 星期二

福岡篇 - 博多駅周邊


第一次去博多既朋友, 都一定會比旅遊書或者地圖迷惑你, 淨係一個JR博多站上蓋, 已經分左四五個商場名, 有阪急, AMU Hakata, 仲有JR Hakata City, Tokyo Hands.......都未計地底既DEITOS, 同KITTE.......總之就一大堆名啦.  除左上面提過既商場之外, 我仲會帶大家去打機玩VR, 行Yodobashi

睇完呢篇文章之後, 包你路痴都變達人. 一齊黎博多啦!


JR Pass Counter

首先教大家去邊度兌換JR Pass先. 當你搭地鐵黎到博多站之後, 用中央口出, 就會喺一座商場既地下出黎. 然後你就要搵下圖呢個JR售票處. (呢度打對面會有兩個一模一樣既售票處, 分別在只有下圖呢個先可以兌換JR Pass) 唔識分唔緊要, 一行入去就知個分別.





一入到去, 大大個牌寫明Rail Pass Counter. 排隊之前, 仲有人教你點填寫資料同睇列車班次添.


呢張枱有齊新幹線同全部特急路線既時間表, 唔明既仲有位小姐專門為你解答. 咁你就可以預早劃定位啦. (提提去長崎既朋友, 長崎博多既早上班次長期爆滿, 一落機就好攞定回程車票, 否則就要搭自由席同人爭架喇.)



JR Hakata City




上圖望到既就係JR Hakata City喇, 個名喺眼眉下方, 你click張相放大佢就會睇得清楚啲. 


而喺JR Hakata City既右手邊, 就係0101百貨商場, 兩者不相連, 要分開門口入.



而喺JR Hakata City既左手邊, 就會見到上圖呢座博多巴士總站, 呢個巴士總站入面有大部份你需要既巴士搭, 包括去機場 (請參閱福岡空港篇)、長崎由布院既高速巴士. 不過呢個唔係重點. 重點容後再講.

講番JR Hakata City先, 一開始嗰陣我咪講左一大堆商場名既. 睇下面呢幅商場指南你就會即刻明白晒.

由右至左咁睇, 紫色部份就係阪急, 中間黃色既就係AMU Hakata, 而左下方綠色既部份就係Tokyo Hands. 所以其實叫乜野名都好, 其實都喺晒同一座建築物入面, 三樣野係互通的, 拿, 有相你睇.


呢個方向行過去就係AMU Hakata

擰轉背就係阪急

我地行陣商場先:






行完樓上就落番地下 (1/F)



喺車站大堂你會見到對上幅圖既字樣, 行入去就係博多站maingu. 呢度有好多特式既手信鋪, 但係最多野賣既, 係蛋糕!

你睇下, 一條街, 十幾檔賣蛋糕既. 叫你一日試一檔都食唔完呀, 我就試左個話自己No. 1 既芝士蛋糕.
味道唔錯架, 可以一試.

好喇, 講完地面再講埋地底, 地底同地面一樣, 唔駛理佢叫DEITOS博多地下街, 總之B1全部都係食肆, 部份有早餐食 (例如: 春水堂) 朝早六七點左右就開門. 而其餘主打晚市宵夜既拉麵店、餐廳等等就十一點開門但係收夜晚十一點.
呢張相係AMU Hakata既B1層, 總之全部都係食肆.


呢度係近新幹線入口既B1層, 呢個位置叫DEITOS. 總之B1層既一定係食肆.

呢個角落專食拉麵, 但係拉麵開十一點.


旅遊書介紹上圖呢間餐廳既早餐. 無他, 一個字 "平", ¥537部可以食到上面咁大個餐. 而最特別既係, 早餐時段佢只賣呢一樣野, 你坐低可以唔駛睇餐牌唔駛點菜, 總之你一坐低, 佢就數人頭拎一盤比你. 味道不過不失. 家常小菜咁.


博多巴士總站



行晒成個JR Hakata City就夠? 梗係未夠啦, 過埋去博多巴士總站玩埋先. 
話就話係巴士總站, 但係其實樓上仲有好野, 例如超大型機鋪NAMCO, 紀伊國屋書店同埋DAISO
呢間NAMCO, 有新宿先玩到既VR架!! 同新宿一樣, 有幾個遊戲你玩, 包括救貓仔, 鬼屋同兩個Action Game. 但係我對VR無乜興趣, 反而見到下面部機就流晒口水, 係新版電車Go!!呀! 我喺秋葉原都搵唔到呢部機, 估唔到黎到博多反而有.



呢部新版電車Go!! 係玩山手線既, 最正係連最新嗰款E235系列車都有得揸. 有幾好玩? 睇片啦! (每局¥300 / 2個站)





東口 (筑紫口)

一如所有既JR站, 博多站都有分東口西口的. 剛才上面講既全部都係西口, 所以下面開始講番東口. 東口又名筑紫口, 而大部份既指示牌都唔會寫東口, 只會寫筑紫口.
由你步出筑紫口既方向計, 望向右手邊, 大電視後面紅色字嗰座就係主角, Yodobashi博多.

係人都知我好鍾意行Yodobashi, 去到邊都總要搵佢出黎. 成個九州, 得博多呢間Yodobashi咋!! 有咩咁好行? 電器、遊戲機、玩具乜都有齊. 而當中仲會有一層半層係商場黎. 賣既都係得意野, 例如....
Village Vanguard香港好似已經執晒, 唯有去日本時行下.

呢個流水冷麵機好似幾好玩咁喎. 

¥100店!!

仲有佢自稱全九州最多機既扭蛋機角落.


呢度仲有個Food Court添, 不過食品種類唔多吸引.


最後, 睇睇個大地圖重溫一下今日學過既野啦.

由右至左開始睇, 右上角既蟹放題早幾集介紹過啦, 然後過少少近東口既就係今日帶大家睇過既Yodobashi博多店.

之後一整個JR站其實就係JR Hakata City, 入面包括有阪急, AMU HakataTokyo Hands.

西口上方係博多巴士總站, 下向有另一個百貨商場0101. 再過少少有間西日本銀行, 呢間銀行係用黎認路既, 上兩集介紹串燒店夢市門同埋運河城都要靠呢間銀行黎做路標.

最左手邊就係下集為大家介紹既中洲喇, 中洲最出名就係中洲屋台, 下集記得繼續收睇達思怪遊世界喇.



福岡篇相關文章:

註: 本文地圖取材自谷歌地圖

沒有留言:

張貼留言