黎得博多, 必定要去呢個商場 - 運河城 Canal City Hakata. 因為呢度衣食住行樣樣齊, 仲有音樂噴泉睇添. 一齊黎玩啦.
入門口前, 見到呢隻野. 原來叫福蛙, 咁中國奧運嗰隻叫乜?
不如我地行入間鋪睇下?
日本地方大就真係好, 間鋪兩層高, 二樓仲有位比你坐.
二樓行到盡, 有條天橋. 行過去就係主樓Center Walk. 嚴格黎講, 呢個商場由六組大樓組成 (如下圖), 剛剛我地經過既就係綠色East Bldg, 過左天橋之後就會去到紅色Center Walk, 不過其實黃色North Bldg同藍色South Bldg都係同紅色Center Walk黐住既, 所以紅黃藍Group埋一齊當佢一座會簡單啲. 至於Grand Bldg其實係酒店範圍, 裏面得高級食肆. 至於另一個藍色既Business Center Bldg對大家黎講無乜用, 除左個Tax Free Counter.
然後二三樓都係一般既零售店, ABC Mart, Coach, agnes b. VOYAGE同埋HH羽絨城.
地下就有Samantha Thavasa&Sweets, Jump Shop, 龍貓共和國等等特色牌子店鋪, 仲有間好好食既雪糕班戟.
不過呢啲通通都唔係重點. 呢個商場既賣點係佢每半小時一次既音樂噴泉表演.
睇到未? 啲水噴到五層樓咁高架. (好普通?) 比啲堅野你睇.
呢度每晚六點後, 音樂噴泉就會結合埋後面間酒店既外牆變成水幕劇場!! 而六月開始, 水幕劇場就會由海賊王2 換成哥斯拉添. 想先睹為快? 我剪左少少片段比大家過下癮先.
如果大家有印象既話, 都會記得我喺福岡空港篇既時候講過. 好幾間福岡博多酒店都係位於運河城附近既. 所以如果你返到酒店, 悶悶地無野好做, 落黎睇下佢個水幕劇場, 然後去地下食個班戟, 咁你嗰日既旅程就非常豐富喇.
交通指南:
運河城位處博多同天神既中間, 而最簡單快捷既方法, 就係由博多站一出, 沿住はがた駅前通り (上圖紫色線), 一路行到尾就見, 步程約15分鐘.
同上集夢市門一樣, 一出博多站, 認住橙紅色嗰座西日本銀行, 條はがた駅前通り就係喺佢同Rakuten中間.
沿途都有指示比你, 唔怕行錯路.
行到去呢個燈位, 運河城就喺正你眼前.
後記: 有啲人會教你搭¥100巴士, 講到自己好勁. 但係我實地睇過, 巴士差唔多半個鐘先得一班, 等得黎我都行到. 調番轉講如果你熟路既話, 我唔教你都識去F月台等巴士啦.
福岡篇相關文章:
註: 本文地圖取材自谷歌地圖
沒有留言:
張貼留言