2018年5月3日 星期四

鳥栖 - 全九州最大Outlet / 平民二手店 2nd Street



邊個話九州好悶無野買? 只係旅遊書無講你知啫. 其實九州都有Outlet行架喎, 就係今日為大家介紹既Tosu Premium Outlets喇. 除此之外, 我仲去左一間平民二手店掃平貨, 你有冇諗過五十蚊港紙可以買到條連身裙? 即刻開始今日既旅程.


Tosu Premium Outlets





呢個係全九州唯一既Outlet, 由博多過黎只需要20分鐘(特急班次計), 而天神亦都有高速巴士可以直達呢個Outlet, 車程約45分鐘. 好喇, 交通指南最後先講, 去買野喇喂.










同其他日本地方既Outlet比較, 呢度較少名牌店, 例如Agnes b呢度都無架. 不過香港人鍾意既Nike, Adidas, Coach, Lowrys Farm都有既. 亦有人話, 九州呢個Outlet係全日本最平既Outlet. 雖然我都叫去過沖繩, 千葉等等既Outlet, 但係由於我唔係同一日去又唔係用同一件貨去比較, 所以好難答你. 不過有一樣野永遠都係真理. 就係日本大過香港咁多, 所以佢啲死貨也好, 斷碼貨也好, 都多過香港. 如果唔係你去東薈城得啦, 駛去日本?



呢支係我人生中飲過最貴既水. 之前既文章講過, 日文人唔係好like Coach呢個牌子, 所以去日本買Coach就最抵, 而日本既Coach仲有鞋賣添架!



日本地方大, 休息既地方當然足夠. 而呢度仲有個小小既兒童遊樂場, 等你老公同小朋友一齊玩, 你自己就開開心心去shopping.


行到攰, 呢度仲有個大Food Court喺正全Outlet既中央. 最後提提大家......
行街之前, 記得去顧客服務中心 (Food Court 旁邊) 出示Passport, 就可以免費攞到上圖呢本Coupon Book, 入面有唔同店鋪既優惠. 唔拎就笨!

Tosu Premium Outlets 網頁: http://www.premiumoutlets.co.jp/cht/

交通指南:

博多出發
鹿兒島本線 (有特急就搭特急啦) 最快20分鐘車程就到達鳥栖站. 鳥栖站有接駁巴士直達Outlet, 每小時一至兩班車.
Huis Ten Bosch 特急列車


JR鳥栖站

紅色箭咀指住嗰個站就係喇
雖然係接駁巴士, 但係佢只係一條普通既巴士線, 所以唔好諗住佢實有大大個廣告喺車身. 你要做既係認住路線編號 "20" 就上車, 無中途站, 一路去到Outlet就落車. 車程15分鐘, 車費¥210.

呢個係由Outlet出發, 回程去鳥栖站既時間表
天神出發
大家可以去西鉄天神高速巴士站 (即係三越既三樓), 就有高速巴士直達Outlet, 車程45分鐘, 車費為¥750. 不過班次非常疏, 建議大家預早一日去西鉄天神高速巴士總站睇定個時間表先安排行程.

行完Outlet咁快就完? 咁就唔係達人啦. 返去鳥栖, 搭一個站火車去新鳥栖站 (約5分鐘), 我帶大家去平民二手店.


2nd Street 平民二手店



新鳥栖站行過黎2nd Street平民二手店約10分鐘. 沿住下面個地圖一直行, 過左條河轉右就見到. 超大間!! 好易認.







話明平民二手店, 呢度當然乜野都有, 除左衫褲鞋襪之外, 電器, 樂器, 玩具, 波衫乜鬼都有.



¥8900咋, 即係七百蚊港紙, 買返黎研究下點贏都好

呢度係名牌手袋區, 不過當然係比較殘既款. 新啲既放左入玻璃櫃
話明係平民二手店, 當然要自己去尋寶. 有啲衫好殘好舊既就無謂睇啦, 但係有啲係新到好似著都未著過就放既都有, 大家花啲時間搵下, 實有好野. 講下女裝方面, 一般中價牌子例如 Lowrys Farm至 i.t.旗下既earth等等都有, 而價錢只係十分之一咋!! 唔信? 比件戰利品你睇下.

上圖呢件Majestic Legon連身裙, 新既一樣. 賣¥700, 即係$50港幣咋!! 

喺呢間二手店旁邊仲有一間二手店. 不過當日休息, 無得入去, 大家經過既時候, 不妨報料話比我聽邊間抵啲?

交通指南:

博多出發
1) 用番上面去鳥栖既方式, 搭鹿兒島本線特急, 25分鐘就到新鳥栖站, 再步行10分鐘就到. (其實只係同鳥栖相差一個站)
2) 直接由博多搭新幹線黎新鳥栖站, 車程只需13分鐘.

熊本出發
搭新幹線直達新鳥栖站, 車程約25分鐘.

註: 本文地圖取材自谷歌地圖

沒有留言:

張貼留言